10 vjet pa ty o Dr. Pjetër Pepa
nga Fritz Radovani
Pritja me buzqeshjen Tuej dashamirse në klinikën dentare të Shkodrës, s’na lejon me kalue përvjetorët pa Ju kujtue, o i Nderuemi Doktor Pepa!
Ju ishi një tubë vllazën të paharrueshëm në Arrën e Madhe të Shkodrës plakë, që keni trashigue vetitë mikpritëse dhe burrnore të njenës ndër lagjet ma të vjetra dhe të nderueme të qytetit tonë të bukur të Veriut!
E Shkodra, nuk i harron kurrë Bijtë e Saj të shtrenjtë e të nderuem! Ajo me kujtesën e Saj të skalitun ndëer Gurt’e Rozafës, kujton me respekt Mikpritjen Tuej vllaznore gjithmonë të haptë e bujare si vetë Shkodra!
E pra, Ajo Shkoderlocja të lindi, të rriti edhe të Burrnoi o Pjetër Pepa!
Jo larg nga kryqzimi i rrugve të Arrës së Madhe në Shkodër, ku asht edhe Kisha e Kuvendi i Françeskanve të vjetër të Shkodrës, nën tingujt shumë të bukur t’atyne kumonve asht le me 18 Dhetor 1942, Pjetër Pepa. Jo larg shtëpisë edhe asht shkollue në tetëvjeçaren e asaj lagjes së tij të vjetër. Në vitet 1960-1965, ka krye Fakultetin e Mjekësisë, dega Stomatologji, ku asht kenë student i dalluem në të gjitha drejtimet. Asht emnue në klinikën dentare në Shkoder në vitin 1965. Ishte i prirun për studime e ajo asht arsyeja që s’asht shkëputë asnjëherë prej librave. Dr. Pjetër Pepa ishte ndër dentistët ma të përsosun dhe të preferuem të Shkodrës. Kujtoj shumë mirë kur botimet e para shkencore i ka fillue në vitin 1966, në revistat periodike: “Shëndeti”, “Shëndetësia Popullore” , “Buletini Shkencave Mjeksore” , “Buletini Stomatologjik”, dhe në organet e shtypit periodik, ku ka botue edhe artikuj të karakterit historik dhe kulturor.
Në vitet 1969-70, Dr. Pjetri, ka shërbye në Lokalitetin e Dukagjinit, ku ka vazhdue me mbledhë materiale studimore nga ajo krahinë. Në vitin 1972, ka krye kursin 3 mujor në Universitetin Shtetëror në Tiranë, dhe ka dhanë disa provime në Fakultetin e Histori-Filologjisë mbas-universitare edhe për gjuhët italisht, frëngjisht e gjermanisht që kishte prirje për ato. Në vitin 1974, asht specializue prap pranë Katedrës së Stomatologjisë për Ortodonti. Gati dhjetë vjet, ka drejtue repartin e Shërbimit të fëmijëve në Klinikën dentare në qytetin e Shkodrës, ku dallohej për kujdesin e madh që tregonte për shëndetin e tyne: gjithmonë i qeshun dhe i gatshëm.
Në periudhën 1990-1996, asht angazhue në proceset demokratike, e asht kenë zgjedhë Deputet i Kuvendit Popullor për dy Legjislatura rradhazi.
Dr. Pjetër Pepa ka krye edhe detyren e Ambasadorit të Shqipnisë pranë Selisë së Shenjtë – Vatikan, gjatë vitit 1997, kur aty drejtonte Papa Gjon Pali i II, dhe kujtohet mirë nga qytetarët e Shkodrës komunikimi i Tyne.
Ishte viti 1998, kur asht kthye në profesion të lirë si pedagog i jashtëm pranë Fakultetit të Mjekësisë, Dr. Pepa mbante detyrën e Shefit të Shërbimit të Pedodontisë pranë Albanian – University e, Shefi i Sektorit Shkencor të Departamentit të Stomatologjisë pranë këtij Universiteti.
Ishte Anëtar i Komisionit Historik për Kanonizimin e Martirëve Shqiptarë per Vatikanin. Asht i dekoruem nga Presidenti i Republikës i asaj kohë me “Medaljen e Trimërisë”, dhe ishte i zgjedhun nga Kuvendi Popullor me detyren e Anëtarit të Bordit Drejtues të “Institutit Studimor për Krimet e Komunizmit në Shqipni”. Ka shumë vlerë saktësia historike!
Dr. Pjetër Pepa asht autor i shumë botimeve shkencore, kulturore dhe politike, ku përfshihet edhe libri “Dosja e Diktaturës” Tiranë 1995. Nder botimet ma të randsishme të Dr. Pjetrit mbeten ato historiko-fetare të vitit 2007, me titull “Tragjedia dhe lavdia e Kishës Katolike Shqiptare”, ndër dy vllime, e “Familje Martire për Fe e Atdhe”, ku spikat mjeshtria e Autorit në paraqitjen e saktë e, gjithshka e dokumentueme historikisht.
Me datën 23 Mars 2014, plot 10 vjet ma parë Dr. Pjetër Pepa, u nda nga kjo jetë papritmas, tue lanë nji dhimbje të thellë për ne që ishim larg nga Shkodra.
Qyteti i Shkodrës humbi një nga qytetarët e përgaditun si mjek dhe, një nga dijetarët e njohun e të pazëvendsueshëm në fushën historike.
Institucionet e interesueme të Shkodrës për Veprat e Dr. Pjetër Pepajt, asht mirë që të ribotojnë prej thesareve të Tij kryesisht ato Vepra që janë aq të domosdoshme për edukimin atdhetar të Rinisë Shqiptare. E mos harroni se Veprat e Tij historike kërkohen edhe n’Australinë e largët!
Mjerisht qytetarët si Dr. Pjetër Pepa, nuk vijnë shpesh qytetit Shkodrës!
Kujtimi i Dr. Pjetrit kjoftë i Përjetshëm!
Melbourne, 21 Mars 2024