Kush është Prof. Dr. Aleksandar Stipçeviq (1930)
Historiani, arkeologu, bibliografi, bibliotekari, eseisti, albanologu i mirënjohur Prof. Dr. Aleksandar Stipçeviç, lindi në fshatin Arbënesh të Zarës, më 10 tetor 1930, në një familje arbëreshe e shpërngulur nga Shkodra rreth treqind vjet më parë. Shkollën fillore dhe atë të mesme i kreu në Zarë, ndërsa studimet e larta universitare për arkeologji i kreu në vitin 1954, në Zagreb. Në vitin 1957, filloi punë në Bibliotekën Kombëtare Universitare të Zagrebit. Gjatë viteve 1970-’73, ligjëroi në në katedrën e historisë të Universitetit të Prishtinës lëndën “Hyrje në arkeologji”, ndërkohë që në Fakultetin Filozofik të Universitetit të Zagrebit, ishte i angazhuar që nga viti 1971, si profesor ordinar ku edhe mbante kursin e historisë së librit, sociologjisë së librit dhe bibliografisë deri sa doli pension në vitin 1997. Në vitet 1974-1983, ishte drejtor i Bibliotekës së Akademisë së Shkencave dhe Arteve të Kroacisë. Ka doktoruar në vitin 1977 në temën “Simbolizmi religjioz te ilirët”. Ka studiuar arkeologjinë dhe ka drejtuar një varg institucionesh e projektesh që lidhen me bibliotekat, historinë e librit, botimet enciklopedike etj., duke mbërritur deri në pozicionet më të larta shkencore në Akademinë e Shkencave dhe Arteve në Zagreb (Kroaci). Veprimtaria shkencore e Aleksandër Stipçeviqit lidhet kryesisht me arkeologjinë, bibliologjinë dhe ilirologjinë, për rezultatet e të cilave ai natyrisht ëshët i njohur si ekspert i këtyre disiplinave në Kroaci edhe jashtë saj. Që nga viti 1967 ai ishte autor i një numri të madh veprash për ilirët dhe historinë e librit si: “Historia e ilirëve”, “Arti i ilirëve”, “Simbolet e kultit te Ilirët”, “Bibliografi për ilirët”, “Historia e librit”, “Censura në biblioteka”, “Interpretime albanologjike”, etj.
Për më shumë se dyzetë e pesë vjet, emri i tij është ngushtësisht i lidhur me ilirët dhe ilirologjinë.
(marrë nga muri i fb i Kastriot Markut, 15 shkurt 2013)
Presidenti Nishani
dekoroi ilirologun Aleksandër Stipçeviq
me Urdhërin “Gjergj Kastrioti Skënderbeu”
Presidenti i Shqipërisë, Bujar Nishani vlerësoi kontributin e akademikut dhe ilirologut arbënesh Aleksandar Stipçeviq me dekoratën “Gjergj Kastrioti Skënderbeu”, që i jepet personaliteteve shqiptare dhe të huaj për ndihmesë të qenësishme ose kontribut madhor në mbrojtjen, forcimin apo përparimin e faktorit shqiptar kudo në botë.
Presidenti i Republikës, Bujar Nishani i akordoi dekoratën me datë 30/1/2015, numër dekreti 8917 me motivacionin: “Në shenjë vlerësimi për kontributin dhe përkushtimin e rrallë në zbulimin dhe hulumtimin e rrënjëve ilire të popullit shqiptar krahas dijes dhe thjeshtësisë karakteristike të një albanologu të vërtetë.”
Presidenti i Republikës vlerësoi punën dhe veprimtarinë shkencore të ilirologut të njohur me përmasa botërore, arbëneshin nga Arbanasi (Arbëneshi) – Zarë (Kroaci), Akademik Aleksandar Stipçeviq.
Dekorata iu dorëzua familjes Stipçeviq, bashkëshortes Angjelka dhe djemve të tij, nga Sekretari i Përgjithshëm i Institucionit të Presidentit, Florjan Nuri dhe Këshilltari i Presidentit për Rajonin, Flamur Gashi
Ceremonia e dorëzimit të dekoratës është zhvillua në ambientet e Ambasadës së Republikës së Shqipërisë në Zagreb. Në këtë aktivitet, ku u nderua dhe vlerësua puna dhe kontributi i akademikut, bibliografit, albanologut dhe ilirologut të shquar kroat, Aleksandar Stipçeviq, arbënesh i Kroacisë nga Arbanasi (Arbëneshi) i qytetit Zarë, morën pjesë përfaqësues të komunitetit shqiptar, nga Këshillat dhe Unionet shqiptare të Kroacisë, shoqata e studentëve shqiptarë, përfaqësues të komuniteteve fetare, ambasadorja e Kosovës në Zagreb, Shkëndije Geci – Sherifi dhe mikpritësi, ambasadori i Shqipërisë, Ilir Melo akademiku shqiptar Prof. Dr. Zef Mirdita, si edhe shumë të ftuar të tjerë.
Në ceremoninë zyrtare të dekorimit morën pjesë tre djemtë e Profesorit Sipçeviq si dhe zonja Angjelka Stipçeviq.
Në fjalën e saj zonja Stipçeviq pasi shprehu konsideratën më të lartë për Kreun e Shtetit shqiptar, presidentin Bujar Nishani si dhe për popullin shqiptar për vlerësimin që iu bë Profofesorit Stipçeviq, ndër të tjera theksoi: “Para dy ditësh e lajmërova në spital Shandrin (Aleksandrin) për Dekoratën “Gjergj Kastrioti Skënderbeu“, dhe ai me lot në sy më tha: “Sa krenar do të ndihen me mua edhe në Shqipëri, tani arbanasit e mi …”
Është kjo dekorata e dytë që Akademik Prof. Dr. Aleksandër Stipçeviqit i akordohet nga Presidenti i Shqipërisë, pas dekoratës që i akordoi ish Presidenti i Shqipërisë, prof. Dr. Rexhep Mejdani, Dekoratën e artë, “Naim Frashëri”, të cilën edhe ia dorëzoi vet President i Republikës së Shqipërisë, Rexhep Mejdani, me motivacionin “Për kontribut në zbardhjen e historisë së ilirëve” më vitin 2001. Nisma për këtë vlerësim ishte nxitur nga agjencia e lajmeve INA dhe redaktori i saj Mehmet Latifi, i cili është i njohur për bashkëpunimin me akademikun Stipçeviq dhe ndjekjen e veprimtarisë së tij shkencore.
http://www.shqiperiaebashkuar.info