Prof. Eqrem Çabej në një Foto Historike
Kjo foto, marrë nga faqja e znj. Brikena Çabej [Eqrem Çabej], e padatuar aty, ka lidhje me Sinodin e Parë Intereparkial të klerit italo-shqiptar, një ngjarje shumë e madhe kjo për botën arbëreshe e që i zhvilloi punimet në Manastirin e Grottaferrata-s pranë Romës, më 13-16 tetor 1940.
Në këtë Sinod mori pjesë një delegacion i Kishës Ortodokse Autoqefale të Shqipërisë, një prej anëtarëve të të cilit ka qenë gjyshi ynë, Atë Erazmi Jorgo (1900-1989). Delegacionin e shoqëronte, ndër të tjerë edhe Dr. Rosolino Petrotta (1894-1969), në rolin e përkthyesit.
Në këtë kohë Prof. Eqrem Çabej (1908 – 1980) ndodhej në Romë për hartimin e Atlasit Gjuhësor, që u botua, siç shënon znj. Brikena, pikërisht në Manastirin e Grottaferrata-s.
Në qendër të fotos është Kardinali Luigi Lavitrano (1874-1950), kryesues i Sinodit. Fotoja duhet të jetë e njërës prej këtyre datave (13-16 tetor), ose e datës 18 tetor, kur pjesëmarrësit e Sinodit, anëtarët e delegacionit të Kishës Ortodokse Autoqefale të Shqipërisë si dhe personalitete të tjerë, bashkë me studentët e Manastirit të Grottaferrata-s e ata të Kolegjit Papnor Grek në Romë u pritën nga Papa Piu XII në Sallën e Konçistorit (Sala di Concistorio) në Vatikan.
Falënderoj mikun Art Shahini, mjeshtër i pashoq në identifikimin e pasurive dokumentare të shkruara e fotografike, i cili para disa kohësh më mundësoi informacion të detajuar mbi Sinodin e Parë Intereparkial italo-shqiptar të Grottaferrata-s, informacion që plotësonte kujtimet e përcjella nga Atë Erazmi.
.
Në foton e plotë: Prof. Eqrem Çabej, në rreshtin e parë, i katërti nga e djathta në të majtë.
Atë Erazmi Jorgo, në rreshtin e tretë, në mes
.
Marrë nga muri i Kristaq Jorgo, 21 tetor 2019