Bismarku dhe Shqiptarët
Më 1879 Abdyl Frashëri dhe Ali Vrioni shkruan të takojnë ne Berlin kancelarin gjerman Otto von Bismarku. Pasi i dëgjoi, ai iu drejtua delegatëve shqiptarë: “Ku i keni veprat e shkruara për Epirin?” Ata thanë se nën pushtimin otoman nuk lejohej shkrimi shqip dhe për shkak të rrethanave të jashtëzakonshme shqiptaret nuk kishin pasur mundësi të bënin studime për çështje kombëtare. Bismarku i dha fund bisedës duke i këshilluar: “Shkoni dhe shpenzoni disa kilogramë ngjyrë duke shkruar vepra mbi historinë tuaj dhe mbi të drejtat tuaja kombëtare, pastaj trokisni në dyert e fuqive të Evropës!” Pas më shumë se tri dekadash lindi shteti i ri shqiptar dhe elitat e Pavarësisë harxhuan shumë kohë, mund e ngjyrë për të shkruar libra, studime, deklarata, analiza dhe dokumente të tjera që lidheshin me identitetin, historinë, sfidat dhe problemet shqiptare. Ndër shqiptarët më të suksesshëm në këtë drejtim dhe ndjekës i këshillës së Bismarkut ishte pikërisht Mid’hat Frashëri, djali i Abdyl Frashërit, njeriu që i fali shtetit shqiptar bibliotekën e tij personale me mbi 40 mijë kopje librash. Studimet e tij kanë vlerë të djeshme, të sotme dhe të nesërme dhe janë tregues i respektit për fjalën, mendjen dhe vlerat.