Dy fjalë për Altin Dumanin
nga Elona Caslli
Nëse Dumani do t’i dilte zot postit që mban e nëse drejtësia do të ishte vërtetë e reformuar, kushdo do të mendohej dy herë para se të shqiptonte emrin e Dumanit dhe institucionit që ai drejton. Në teori emri i Dumanit duhet të tundë dheun. Në praktikë, kryebashkiaku Veliaj me lehtësine e papërballueshme të qënies, Dumanin e quan koleg dhe karshi kësaj etikete Dumani jep një përgjigje krejt anemike.
Nuk prisja që të reagonte Kryeministri për akuzat e Ahmetajt sot. Qartazi urdhri ish dhënë për heshtje mediatike. Nuk prisja të reagonte as ndonjë deputet i Sektit Rilindas. Skllevërit vullnetarë nuk mund të reagojnë.
Dumani duhet të reagonte sepse në emër të tij u adresuan akuza për fshehje provash. Nuk e akuzoi militanti i Partisë Demokratike. Nuk e akuzoi as Kryetari i Partisë Demokratike, i cili duket se është dënuar me hetim të përjetshëm, pasi akuzë nuk ka.
E akuzoi as më pak e as më shumë veçse numri dy i qeverisë dhe madje e sfidoi duke thënë që Dumanit i mungonte guximi të merrte dëshminë e Ahmetajt.
Dumani nuk ka luksin të heshtë përballë akuzave të tilla. Heshtja në këtë rast më kujton thënien italiane “Chi tacce, acconsente.”
Post Scriptum – E nëse Dumani hesht, do të heshtë çdo akt drejtësie në këtë vend dhe do të flasë vetëm Drejtësia e Kryeministrit.
Marrë nga Muri i FB, Elona Caslli, 31 gusht 2024