Kur flet sovrani, duhet të heshtë elita
nga Kastriot Çipi
Ndodhi në Rumani, por shumica nuk ia vuri veshin kambanave. Dy kandidatë për president, të dy të djathtë, u përjashtuan nga gara, pa ligj, pa vendim gjykate! Me vendim të Komisionit Zgjedhor.
Në bazë të Nenit 55 “Agjitacion e propagandë kundër pushtetit popullor”, dmth kundër BE-së.
Tani u përsërit në Francë. Le Pen, që ishte fituese në çdo sondazh për zgjedhjet presidenciale të vitit 2027, u shpall fajtore për shpërdorim fondesh të BE-së dhe gjyqtari i çështjes vendosi t’i japë edhe një dënim tjetër: përjashtimin nga gara presidenciale!
Prap askush në BE nuk sheh ndonjë problem!
Kur arrestohet kryebashkiaku i Stambollit, i dyshuar për korrupsion dhe terrorizëm, elita globaliste ulurin se po shkelet demokracia në Turqi, se Erdogani është diktator. Kur ndodh në Rumani e në Francë, elita është dakord, sepse ata janë kandidatë të djathtë dhe elita nuk mund ta lejojë popullin e gjorë të gabojë, duke i zgjedhur.
E pra, duhet një nen në Kushtetutë, që garanton të drejtën e zgjedhjes edhe nëse je në burg! Përderisa presidentët kanë kudo të drejtën e faljes, për çfarëdo krimi të kryer, pse nuk duhet ta ketë këtë të drejtë Sovrani, Populli? Nëse ishte e drejtë që Ilaria Salis dhe Fredi Beleri të shkonin në Parlamentin Europian, pa përfunduar gjykimi i tyre, ishte e drejtë që edhe Trump të shkonte në Shtëpinë e Bardhë, pavarësisht proceseve të hapura që kishte.
Le të gjykohen të gjithë, le të shkojnë edhe në burg, por nuk duhet t’u hiqet e drejta për t’u zgjedhur as Calin Georgescut e Diana Sosoacas në Rumani, as Ekrem Imamoglut në Turqi e as Marine Le Pen në Francë!
Marrë nga Muri i FB, Kastriot Çipi, 1 prill 2025
