Ministri i Financave – Rrok Gera
nga Ilir Seci
Në vitin 1935, Mbreti Zog emnoi ministër financash shkodranin e nderuem Rrok Gera, i cili ka kenë proverbial për ndershmëninë e tij.
Rrok Gera kishte krye studimet universitare në Austri për financë, me rezultate të shkëlqyeme. Edhe pse e lusin me ndejtë atje si pedagog, nuk tundohet por kthehet në atdhe.
“Mbaroje shkollë bir e ktheju se duhet me ba për vend tand…” – i kish thanë i ati që e kish rritë me mund.
Mbasi caktohet ministër financash bani çka e ishte e mujtun me modernizue sistemin financiar të Shqipnisë, mision thuejse i pamujtun kur mendon se vendi nuk kishte pasë thuejse asnji traditë në atë fushë. Gjatë asaj kohë, Rrok Gera u ba i njoftun për ndershmërinë e tij proverbiale. Njaq i ndershëm ka kenë saqë kur shkonte për Shkodër çdo fundjavë, vetë udhëtonte me makinën e shtetit kurse gruan e fëmijët i sillte më taksi nga Tirana deri në Shkodër.
“Nuk asht makina e familjes kjo!” – u thoshte të afërmeve që e pyesnin të habitun pse vepronte ashtu, – “Asht për mua kjo makinë, nuk asht për familjen teme!” …Çdo herë e njajta gja kur shkonte fundjavave në Shkodër pranë të afërmve të vet. Vetëm me guxue me e krahasue me ministrat e 80 viteve ma vonë. Me e krahasue me atë ministren që përdorte helikopterët e ushtrisë së shtetit me bajtë materialet e ndërtimit të vilës në Vermosh.
Ato ditë e mbrame të mbretnisë, pak para pushtimit fashist të Shqipërisë, Mbreti Zog dërgon nji përfaqësues për më marrë rezervën e arit që ishte e taksueme per qeverine ne rast largimi nga vendi. Ministri i Financave, Rrok Gera i thotë korrierit të mbretit se: “Unë s’mund ta jap arin ashtu. Mblidhni parlamentin, dhe merrni vendim në rrugë ligjore. Bane ligjin, hidheni në votim, kalojani qeverisë për zbatim e mbasi ta miratoje këshilli i Ministrave, unë atëhere si ministër financash e zbatoj menjiherë vendimin!”
Duke e ditë natyrën e Rrok Gerës, kanë mbledhë parlamentin në minutën e fundit, kanë marrë vendimin brenda ligjeve dhe vetëm ashtu në rrugë ligjore asht dhënë ari i rezervës për qeverinë në ekzil. Mbas lufte, Rrok Gera u arrestue nga komunistët, e dënuen por me gjithë përpjekjet e tyre të shumta sigurimsat nuk i sajuan dot një akuzë për vjedhje apo shpërdorim, sepse gjithshka e kishte bërë konform ligjeve.
Ata prap e dënuan se ai sistem të dënonte edhe pa pasë asnjë faj, por mbas disa viteve burg u shpall i pafajshëm e u lirue. Kur doli nga burgu punoi si llogaritar në ndërmarrje deri sa doli ne pension.
Në vitin 1992, parlamenti i parë pluralist ka hapë hetim me shqyrtue dokumentacionin e bankës së shtetit shqiptar lidhun me dhanien e arit aq të përfolur të Mbretit Zog. Akti i dhanies ishte krye mbrenda të tanë dispozitave ligjeve dhe konform kushtetutës të asaj kohe. Dhe e tanë kjo falë këmbënguljes të nji njeriu si Rrok Gera.
Kur mendon se ku jemi sot mbas 82 vitesh…
(*Fotoja e z. Rrok Gera asht marrë nga Kalendari Enciklopedik i vjetës 1936.)