Miresevjen të prehesh në Dheun tënd Qazim bej Mulleti….
nga Adriatik R. Dosti
Përmes një postimi publik të mikut tim të mirë e piktorit të njohur tiranas Adnand Deda këm mësuar lajmin se me 28 Gusht vjen të prehet në Atdhe, figura e njohur patriotike dhe nacionaliste e atdhetarit të njohur dhe intelektualit të spikatur kryeqytetas, Qazim bej Mulletit…
Të them të drejtën ndjeva një kënaqësi qytetarie e shqiptarie të veçantë, një lehtësim shpirtëror e një ndjenjë ku fisnikëria, nderi, respekti e mirënjohja në fund të fundit, pas vuajtjesh pa fund e errësirës vrastare, triumfojnë ndaj së Keqes… dhe vënë drejtësinë në vendin që i takon…
Kurrë s’ka ndodhur deri me sot që errësira të triumfojë mbi Dritën… dhe kurrë s’do të ndodhë as sot e as mot…
…Kam shkruar kohë më parë një shkrim të gjatë e të veçantë ku kam treguar me detaje se cili ishte Qazim bej Mulleti, dhe ç’përfaqëson për Tiranën e Shqipërinë figura komplekse e tij…
I lindur në Tiranë më 20 dhjetor të 1893 në një familje patriote e fisnike tironase…
U arsimua e u shkollua, por edhe u dipllomua në universitetet më të mira të Janinës, Vjenës e të Stambollit…
Patriot, nacionalist e intelektual i orëve të para… madje pjesmarrës e organizator i ngritjes së flamurit kombëtar në Tiranë gjatë periudhës që Shqipëria shpallte pavarësinë e saj kombëtare…
Luftëtar i Pavarësisë, por edhe i mbrojtjes së trojeve shqiptare nga hordhitë fashiste e shoviniste serbo-greke…
Antikomunist dhe në rrethana ende të paqarta plotësisht edhe antizogist… por mbi të gjitha shqiptar i ndershëm e atdhedashës.
Shumë i ditur, i kulturuar e i lexuar…e mbi të gjitha i njerëzishëm deri në admirim.
Fliste disa gjuhë të huaja e kish një ndër bibliotekat më të pasura në Tiranën e viteve 1935-44.
Ishte kryetar i Bashkisë së Tironës në periudhen 1939-40, si dhe Prefekti i Tirones në 1942-44!
Dhe pikërisht ata që e shanë, ofenduan, poshtëruan… i degdisën familjen në internim dhe e dënuan me vdekje në mungesë… komunistët, ishin më së shumti ata që gjatë luftës u ndihmuan e u shpëtuan prej plumbit e burgut fashist pikërisht prej Qazim bej Mulletit… por dihet pabesia e soj-llojit të tyre… ndaj dhe shprehja e pavdekshme e tij se: mirë që jon rracë e poshtër, por shtohen ene si fara e hisllit… mbetet ende postulat mençurie…
E mbi të gjitha ajo ç’ka doli nga goja e tij në ato vite se… “po zdrypi katunaria m’qytet… kombi osht m’rrezik!” çka Shqipëria e shqiptarët e vuajtën saktësisht e më së shumti në periudhën 1944-90, mbetet një nga shprehjet më të mençura e me brilante që unë personalisht di e citoj herë pas here… e deri më sot.
Për t’i shpëtuar vdekjes së sigurt prej dorës së sadistëve komunistë, Qazim bej Mulleti fill pas lufte iku në Itali… duke gabuar rënde teksa la familjen e tij në Tiranë…gjithesesi duke qenë idealist e duke besuar e shpresuar se ata që sapo kishin ardhur në pushtet – komunistët nuk do të shkonin aq larg… derisa të merreshin kanibalisht edhe me familjen e tij… të cilën Monstrat për hir të së vërtetës e masakruan me plot kuptimin e fjalës për vite e vite me radhë… duke kulmuar edhe me komedinë e tyre “të famëshme” e denigruese por tepër të neveritëshme e qesharako-sharlataneske – “Prefekti”!
Qazim bej Mulleti ndërroi jetë në moshën 63 vjeçare në Rocca di Papa [Romë] të Italisë, në vitin 1956… dhe pas një kalvari të dhimbshëm shumëvjecar post-mortor… më së fundi pas plot 67 vjetësh arkëmorti i tij do të mbërrijë të hënën e 28 gushtit 2023, në Atdhe e në Tironën e tij të dashur e të shtrenjtë të cilën ai e deshte aq fort…
Më mirë vonë se kurrë!
Falenderoj nga zemra të gjithë ata që bënë të mundur rivendosjen në panteonin e nderit të burrave të shquar të kombit tonë!
Eshtë në nderin e dinjitetin e çdo shqiptari të ndershëm, atdhetar, nacionalist, patriot, demokrat e antikomunist… veçmas edhe një lloj detyrimi moral e qytetar për çdo familje tironase që të dalë e ta presë e ta përcjellë me nderimet e respektin e duhur për në Dheun e tokës së tij Mëmë… shumë të nderuarin Qazim bej Mulleti…
Eshtë në nderin e bashkisë së Tiranës e veçmas edhe një lloj detyrimi patriotiko-kombetar i antareve te opozites ne keshillin bashkiak te Tiranes qe te kerkojne e insistojne qe sheshit ne Pazarin e Ri ti vihet emri i nderuar i Qazim bej Mulletit… e që prej aty busti i terroristit bolshevik Avni Rustemi të zëvendësohet me bustin e tij…
Nderi dhe dinjiteti i një kombi e i një populli fillon e mbaron pikërisht aty… kur ai di se si ta shkruajë e ta mbrojë historinë e tij të vërtetë kombëtare.
Marrë nga Muri i FB Adriatik R. Dosti, 24 gusht 2023