Në kujtim të Rin Monajkës
nga Sokol Parruca
Rini meriton shumë më tepër nga sa mund të shkruajmë ne që e kemi njohur…
Elegant në paraqitje e tepër fin në mendime, sjellje e qëndrim.
Shokun tim të sportit (ishim të dy me të rinjtë e Vllaznisë) dhe takoheshim pothuajse çdo ditë… I urtë, i zgjuar, tepër i edukuar e me kulturë… po i heshtur dhe disi i tërhequr si tip, megjithatë me jepte kënaqësi kur e takoja e bisedoja…
Ndodhi, diku aty nga fundviti 1980, që filloi të më shmangej disi. E ndjeja… ndonëse vështrimi i tij ndaj meje nuk e kishte humbur asnjëherë shkëlqimin e miqësisë…
Asokohe, nuk arrija ta kuptoja shkakun e këtij ndryshimi te Rin Monajka ndaj meje. Kurrë nuk i kishim dhënë arsye njëri-tjetrit për këtë lloj ftohje. Më vonë e mësova, ditën që e kishin arrestuar… ndërkohë unë punoja e banoja në Tiranë. Ai kishte dalë haptazi kundër sistemit, duke qenë edhe ndër organizatorët e rrëzimit të bustit të Stalinit… Atëherë e mendova, se ai shikim i tij, sikur donte të më thoshte mos rri me mua, ndofta për të mos më implikuar… ose çka është më e besueshme, ai më njesonte edhe mua si pjesë e sistemit çka natyrshëm kishte sjellë ftohjen e miqësisë mes nesh… Sidoqoftë, nuk më linte meraku pa pyetur për të… E vërteta ishte se e kishin rrahur, torturuar, sakatosur e shpërfytyruar deri në atë gjendje sa më pas ato plagë e rënduan keq shëndetin e tij, sa i morën edhe jetën…
E askush nuk u dënua…!
Iku Rin Monajka, u harrua, për t’u kujtuar vetëm nga familja, të afërmit, shokët e askush tjetër. Ndonëse, ai veproi guximshëm me bindje dhe i vendosur kundër atij sistemi… sot nuk shohim një pllakë, një gur, një rrugë apo rrugicë të mbajë emrin e tij, pse jo edhe një bust ku të përjetësohej akti i tij! Rini dha jetën për ideal e demokraci… edhe pse në të gjallë të tij qe fjalëpak, modest, i pa bujë dhe e urrente mburrjen… Ai mbetet një hero i vërtetë i demokracisë… dhe si një hero i tillë, ai duhet të gëzojë të gjitha nderimet, vlerësimet dhe respektin.
Urtësia e modestia që po e ndjek Rinin edhe mbas kaq vitesh që e kemi humbur duhet të shërbejë si një ftesë për vëmendje ndaj këtij njeriu, që nuk e mbajti veten për hero… po që shokët dhe shoqëria ia dhanë titullin e heroit.
Mirënjohje e nderim për Ty Rin
Pushofsh në paqe mik,
Marrë nga Muri i FB Sokol Parruca, 15 janar 2021