Nexhmije Pagarusha, t’i puth duart…
nga Eda Zari
Më 7 Maj 2018, Ikona jonë, Nexhmije Pagarusha, feston 85 vitet e saj të florinjta!
Ta kam thënë: “Dua të shkruaj emrin Tënd në plepin e vjetër…, sepse të dua me gjerësinë e detit dhe shtrirjen e qiejve…”
E kush nuk e njeh Pagarushën legjendare??
Më shumë se një këngëtare Pagarusha është një diva pa maniera, një talent dhe kontribut muzikor, një ikonë kulturore, simbol i një populli dhe trashëgimie të vojtur, një ambasadore paqesjellëse. Ajo pranohet në mënyrë rutinore nga të gjithë. Mbi të gjitha nga njerëzit e lënë jashtë shoqërisë, ata që këngët e saj i këndojnë në gaz e në vaj, që dritën e syve e kanë humbur, por shohin jetën me dritën e shpirtit. Për mua, ndryshe nga çdo artist tjetër, zëri i saj këngëtor pikturon fytyrën e shpresës, mallit, dashurisë, pritjes, lutjes dhe bekimit!
Të puth duart ty fqinje e Hënës tek mekesh me klas: “E dehun jam”, apo tek vibron: “E kujtoj un’ at takim, me lot e dashuri…!”
Këngët e saj dëshmojnë për gjenialitetin muzikor, kolegialitetin dhe frymën e bashkëpunimit me kompozitorët e saj të zemrës, që ndër vite na falën një sfond të gjerë muzikor, duke krijuar një fenomen unik kulturor.
Pagarush, Ti fyell mëngjesor! Ti je një letër dashurie Trinish nga e kaluara, e tashmja dhe e ardhmja!
85 vjetori i ditëlindjes tënde është festimi ynë, festimi i fëmijërisë sonë dhe i rinisë sonë, i lutjeve tona, dashurisë sonë, forca, krenaria, lavdia, nderi dhe madje pavarësia e gruas, ndjenjë e qenies.
Të puth duart…
E jotja Eda.
7 Maj 2018
http://www.kultplus.com/opinione/eda-zari-nexhmije-pagarusha-ti-puth-duart/