Opera e Kosovës, prezanton “Goca e Kaçanikut” të Rauf Dhomit
dhe baritonin Hektor Leka, në rolin e Plakut
Në radhë të parë dua të falenderoj nga Zemra për besimin dhe mbështetjen që më dhanë duke më ftuar si një nga protagonistët e kësaj opere regjisorin Prof. Nikolin Gurakuqi (Mjeshtër i Madh), dirigjentin Edon Ramadani dhe në fund, por jo se i fundit, Drejtorin e Operës së Kosovës, Meriton Ferizi dhe stafin drejtues.
Ka qenë një kënaqësi e madhe për mua që pas gati 45 vjetëve, të takoj kompozitorin e saj, Prof. Rauf Dhomi-n, i cili në premierën e parë të vitit 1979, në Tiranë kishte bashkëpunuar me Nënën time, e cila atëherë mbulonte rolin e dirigjentes së korit.
Një falenderim i veçantë u shkon edhe të gjithë bashkëpunëtorëve, orkestrës dhe korit dhe të gjithë repartit teknik.
Në fund dua t’ju uroj të gjithë kolegëve të mi një kurorëzim me sukses të kësaj Premiere historike për Kosovën. Jo vetëm se është opera e parë e një autori kosovar, por edhe sepse është hera e parë që realizohet në Kosovë një opera me të gjjthe përfaqësues e trevave shqiptare.
Një “In bocca al lupo”, siç thuhet andej nga Italia, të gjithëve!!!
Hektor Leka
Kush është Hektor Leka
Hektor Leka u lind në Tiranë, ku fillon që në moshë të re studimin e violinës dhe më pas kantos nën drejtimin e nënës së tij, mexosopranos së njohur shqiptare, Rozmari Jorganxhi, për të vazhduar më pas në Liceun Artistik dhe në Akademinë e Arteve të Bukura në Tiranë me Prof. Frano Lufi.
Në vitin 1992, transferohet në Trieshtë të Italisë, ku fillimisht ndjek një kurs të organizuar nga Teatri Lirik “Giuseppe Verdi” për këngëtarë të rinj nën drejtimin e Prof. Claudio Strudof, për të vazhduar në Konservatorin “Giuseppe Tartini” të Trieshtës. Nën drejtimin e Maestro Marco Sofianopulo realizon disa produksione si Requiem nga A. Bruckner, një koleksion këngësh Gregoriane të ripunuara nga i njëjti maestro, koncerte dhe evente të ndryshme të karakterit fetar të regjistruara nga RAI dhe disa pjesë të kompozuara posaçërisht për zërin e tij nga i njëjti Maestro.
Në fushën operistike Lekaj debuton në vitin 1997, në produksionin e “La Traviata” (Marchese D’Obigny) në Lignano Sabbiadoro nën drejtimin e Maestro Francesco Maria Martini. Disa vite më vonë bën debutimin e tij si Sparafucile në operën “Rigoletto” të Giuseppe Verdit dhe më pas si Don Basilio në “Il barbiere di Siviglia” të G. Rossinit. Nën drejtimin e Maestro Severino Zannerini ka debutuar me sukses rolin e titullit, në operën “Il Signor Bruschino” ku pati një sukses jo vetëm me publikun po edhe me kritikën. Gjithashtu ka realizuar koncerte dhe recitale të shumta në Trieshtë, Gorizia, Udine, Pordenone, Padova, Fiume, Copper, Arezzo etj. duke ekzekutuar pjesë nga repertori i shenjtë, lirik dhe lirikoetnik.
Në vitin 2003, realizon një recital me muzikë nga të gjitha vendet e Ballkanit ku pjesët nga autorët shqiptarë u prezantuan për herë të parë në Itali. Suksesi i kritikës e bëri të përsërisë të njëjtin recital edhe në vitin 2005.
Ka qenë edhe Doktor Grenvil, në edicionin më të fundit të “La Traviata”, të vënë në skenë nga Teatro “G. Verdi” i Trieshtës, ku edhe punon rregullisht prej vitit 1997.
Marrë nga Muri i FB Opera e Kosovës, 22 shkurt 2024