Historia duhet shkruar ashtu siç është…
Pak dritë mbi figurën e Qazim Mulletit
nga Adriatik R. Dosti
Nuk e di saktësisht nëse Bashkia e Tiranës… apo Këshilli i saj që përbehet nga socialistë, lësëistë e demokratë… të jetë marrë ndonjëherë me vlerësimin real a rivlerësimin historik të disa prej figurave më të rëndësishme të jetës politike, shoqërore e sociale që kanë drejtuar Kryeqytetin e shqiptarëve që prej themelimit të tij më 1925 e në vazhdim…
E politizuar deri në ekstrem, sidomos nga diktatura gjatë periudhes 1944-1991, shqiptarëve u është servirur gjithmonë dhunshëm historia e gënjeshtërt e Kombit të tyre si dhe u janë denigruar për qëllime të caktuara sërish politike qindra figura të shquara të historisë kombëtare të Shqipërisë.
Në këtë kuadër në pak radhë të këtij shkrimi – kujtesë për Bashkinë e Tiranës… dua t’ju sjell ndërmendje drejtuesve të saj, pavarësisht ngjyrimit politik të cilit i përkasin që…
…është në nderin dhe dinjitetin tuaj, të rivlerësoni ashtu siç ka qënë në të vërtetë, siç është e siç i duhet servirur opinionit publik kryeqytetas e atij mbarëkombëtar shqiptar… figura intelektuale e patriotike e ish Prefektit të Tiranës gjatë Luftës së Dytë Botërore: Qazim Mulleti! Figurë të cilën në mënyrën më të paturpshme e antinjerëzore, por edhe antishqiptare regjimi komunist e degradoi në mënyrën më poshtëruese e më të qëllimshme…
Eshtë në nderin e Bashkisë së Tiranës, fjala vjen që Sheshi i rinovuar i Pazarit të Ri, të marrë emrin Sheshi Qazim Mulleti… si dhe diku aty pranë ku ka jetuar familja kryeqytetase, patriotike, intelektuale e atdhetare… Mulleti… të ngrihet e të vendoset edhe një bust a statujë e tij…
Them për këtë shesh, pasi aty pranë ka qenë shtëpia e famëshme patriotike dhe intelektuale e tij dhe e Familjes së Mulletëve…
Gjithashtu, ju propozoj që të miratoni më anë të një ligji a dekreti të veçantë… ndalimin e rishfaqjes së Komedisë Prefekti… në të gjitha llojet e mjeteve vizive kombëtare… që duke denigruar figurën e Qazim Mulletit e të familjes së tij patriotike i shërbeu vetëm, ideollogjisë përçarëse e antikombëtare shqiptare të Diktatorit e Diktaturës së tij kriminale!
.
pak para atentatit ndaj Mbretit Zog, Vjenë 1932
Ja cili është Qazim Mulleti i vërtetë…
I papërlyer me ngjyrimet politike…
Lindi në Tiranë me 20 dhjetor 1893, dhe vdiq në Romë me 28 Gusht 1956.
Ndoqi studimet në Gjimnazin e famshëm ”Zosimea” të Janinës, e më pas ne Kolegjin turk të Stambollit ”Gallatasaraj”, ku i përfundoi ato me Medalje Ari.
Më pas në studime speciale do të dipllomohej në Vjenë edhe për Dipllomaci ushtarake të luftës.
I ditur, i kulturuar, qytetar i dorës së parë, atdhetar e patriot i orëve të para.
Zotëronte e fliste lirshëm 9 gjuhë të huaja si: italisht, frëngjisht, gjermanisht, turqisht, arabisht, serbo -kroatisht, greqisht, latinisht dhe osmanisht…
Së bashku me një grup studentësh tiranas, me 1912 merr pjesë në ngritjen e Flamurit Kombëtar në Tiranë…
Më 1920, merr pjesë në Kongresin historik të Lushnjes.
Po me 1920, do të ishte në krye të Vullnetarëve kombëtare, si Komandant i tyre kundër hordhive serbe.
Më 1921, është pjesmarrës tepër aktiv në Kongresin e Bashkimit Kombëtar në Vlorë, së bashku me patriotët e shquar të kohes Hafiz Ibrahim Dalliu dhe Musa Maçi… si përfaqësues të Shoqërise atdhetaro – patriotike ”Lidhja Kombëtare”.
Shtëpia e tyre e Mulletëve… në rrugën e sotme ”Qemal Stafa”, në Pazar të Ri, në ato vite jo vetëm që shërbeu edhe si godina e parë e një Ministrie shqiptare asaj të Bujqësisë, por u bë edhe një ndër Rezidencat e para të Qeverisë së dalë nga Kongresi i Lushnjes, duke strehuar provizorisht edhe përfaqësuesit e parë të Tiranës si Kryeqyteti i ardhshëm i Shqipërisë…
Gjatë Luftës së Dytë Botërore, Qazim Mulleti (që për arësye të ndryshme pak vite më parë qe radhitur në krahun antizogist…) do të ishte Prefekt i Tiranës, duke ndihmuar jo pak një numër jo të vogël nacional-çlirimtarësh të asaj kohe dhe patriotësh e intelektualësh shqiptarë e sidomos kryeqytetas e nga zonat e Shqipërisë së Mesme, me të cilët Fashizmi kishte qartazi llogari të hapura.
.
E ripërsëris, është koha për të mos thënë se si kudo e në çdo gjë jemi të stërvonuar që ne shqiptarët të rishkruajmë qartësisht dhe egzaktësisht, të zezën mbi të bardhë… Historinë tonë të vërtetë kombëtare duke i dhënë secilit atë çka i takon… çka do të thotë …atë që ka bërë e ka lënë në të mirë a në të keq të Kombit e të popullit të tij…
E thënë me dy reshta: Qazim Mulleti i vetëm dinte aq gjuhë të huaja sa çdinte e gjithë Byroja politike e Enver Hoxhës… marrë së bashku… Kishte lexuar aq libra sa ç’kishte lexuar i gjithë Komiteti Qendror i Diktatorit… dhe kishte aq kulturë, qytetari e civilizim… sa që Khmeret e Kuq të Diktatorit të Zi shqiptar… nuk e patën dot Kurrë…
Ndaj mjaft më me politizime ekstreme, banale, bajate e te neveritëshme… ku tradhëtarët ende i kemi Heronj të Kombit dhe Heronjtë e Vërtetë të Kombit i kemi zbritur dhunshëm nga piedestalet!