Qyteti ilir në Bushat të Shkodrës
Për rreth 4 javë, gërmimet e Institutit të Arkeologjisë në Tiranë të drejtuara nga Prof. As. Saimir Shpuza dhe Prof. Piotr Dyczek nga Universiteti i Varshavës në Poloni në bashkëpunim me #drtk_shkoder, Helidon Sokoli, arkeolog nxorën në dritë të tjera gjurmë dhe të dhëna për qytetin ilir në Bushat.
Pas fushatave të mëparshme ku u zbuluan dy porta hyrëse të qytetit dhe u lejua të kuptohej shtrirja e tij, gërmimet e këtij viti janë përqëndruar në qytetin e sipërm dhe kanë për qëllim zbulimin e organizimit të brendshëm të urbanistikës së këtij qyteti.
Misioni kërkimor po nxjerr në dritë se kjo pjesë e qytetit të sipërm ka qenë e ndërtuar masivisht që në gjysmën e shek 4 p.e.s., sipas datimeve paraprake.
Aktiviteti në terren, ka për qëllim zbulimin e plotë të planimetrisë së këtyre ndërtimeve dhe më pas të arrijë të identifikojë rolin që ato kanë patur.
Kërkimet shqiptaro-polake në Bushat janë parashikuar të vazhdojnë për disa vite në përpjekje për të zbuluar sa më shumë nga forma dhe historia e këtij qyteti.
Tashmë falë bashkëpunimit mes Misionit Arkeologjik dhe DRTK Shkodër, po hartohet dosja teknike për shpalljen “Zonë e mbrojtur arkeologjike” A dhe B, duke plotësuar kështu hartën arkeologjike të arealit të Shkodrës edhe me një qytet antik dhe sit arkeologjik të vizitueshëm në të ardhmen.
Misioni Shqiptaro-Polak, i cili që nga viti 2011, hulumton në gjurmët e Shkodrës antike, ndër vite ka nxjerr në dritë zbulime dhe artefakte të rëndësishme mbi shtrirjen e qytetit, urbanizimin e tij, sistemin mbrojtës të qytetit në pjesën e ulët të tij.
Ministria e Ekonomisë, Kulturës dhe Inovacionit
Instituti Kombëtar i Trashëgimisë
Marrë nga Zefjana DRKT Shkodër