Si u sulmua Kelmendi në 5 drejtime?!
nga Uran Butka
Simbas urdhërit të komandantit të operacionit Mehmet Shehut, Kelmendi do të sulmohej në pesë drejtime: Batalioni IV i Brigadës I, sëbashku me dy batalionet e Brigadës XXIII, të hiqej nga Tuzi i Jugosllavisë, e të hynte në rajonin e Vermoshit dhe, mbasi të linte një forcë mbështetëse, të marrshonte me shpejtësi në drejtim të Nikçit e të Vuklit.
Batalioni I i Brigadës I, sëbashku me batalionin III të Brigadës së XXIV do të niseshin prej Shkrelit për në Bogë dhe, duke kaluar në Alpet e larta të Shqipërisë (Qafën e Pejës), do të sulmonte Nikçin nga ana e lindjes dhe të ndalonte tërheqjen e Prek Calit nga ai drejtim. Batalioni i III i Brigadës I të nisej nga Kopliku, të kalonte Qafën e Kapës dhe të dilte mbi Brojë. Batalioni i V i Brigadës I, do të qënderonte në pritë mbi pozicionet qe kishte në Rahovicë, me qëllim që, kur të hapej zjarr në Brojë, të bashkëpunonte me batalionin e III. Për të dalë operacioni me sukses, veç kësaj, batalioni IV i Brigadës XXIV, u caktua të qendronte në kodrat mbi urën e Tamarës, në rrugen që të çon në Selcë, për të mbeshtetur forcat e sektorit të Vermoshit, kur të fillonin veprimet luftarake në atë drejtim.
Gjithashtu, dy batalione të tjera të Brigadës XXIV (batalioni I dhe II) ishin përqendruar në rajonin e Koplikut, Shkrelit dhe Kastratit, si rezervë për të mbuluar forcat vepruese të brigadave që vepronin në Kelmend.
Lufta e Kelmendit ka filluar me 13 janar 1945, dhe ka përfunduar në mesin e muajit shkurt po 1945, me pjesëmarrjen e ushtrisë qeveritare që kishte sulmuar e rrethuar Kelmendin, si dhe të banorëve Kelmendas, që po sulmoheshin sikur të ishin pushtues, edhe pse ishin në vendin dhe në shtëpitë e veta. Ndërsa kjo luftë në Malsinë e Madhe në të cilën janë përfshirë përveç Kelmendit edhe Kastrati e Shkreli, ka zgjatur nga 3 janari 1945, deri me 16 shkurt po 1945, nga forcat partizane rezulton se jenë vrarë 39 partizanë dhe plagosur 48. Ndërsa nga Malsorët kryengritës 44 luftëtarë dhe u plagosën 21 të tjerë. Viktima të kësaj lufte civile janë afër 150 persona, ndër më të zgjedhurit e zonës së Kelmendit.
.