Siluruesi katërsh sovjetik
nga Muçi Xhepa
Krishtlindje. Mukja është ulur në stol i vetëm. Dallgët e Adriatikut fillojnë të ngrihen e përplasen me forcë në molin e betontë. Shtrëngon shallin e leshtë. Dhuratë prej duarve të arta të nënës.
“Po afrohen, është ngritur niveli i ujit”, iu bë zëri i oficerit. “Muke, njofto komandën qendrore se Flota e 6-të po i afrohet ujërave të detit Jon. Shto këtë. Jemi në gatishmëri të plotë… ta ndalojmë të shkelë ujërat tona…”.
Buzëqesh. Sa të marrë, thotë me vete. Në horizont shfaqet aeroplanmbajtësja e flotës-gjashtë. Forca amerikane në Mesdhe. Ka ditë që flitet për praninë e saj në ujërat italiane. Në kufirin e Kosovës janë vendosur njësite luftarake serbe. Me armatime ruse. S’kanë zënë mend. Buzëqeshja i kthehet në të qeshur me zë.
-Presioni u shtua. Këmbënguljes së përfaqësuesit nga Tirana iu ngjit edhe arsyetimi i një të afërmi të familjes.
“Do të kesh rroba falas. Kostum teritali. Shkollën gratis. Dhe mos harro! Ushqimi është i cilësisë së lartë. Jo si në shtëpi”.
Më tregon Mukja në mësinxher. Jeton prej një çerek shekulli në Itali. Kemi qenë shokë klase që nga e para deri në të tetën. Nxënës studioz dhe i dashur me të tërë. Kur mbaroi maturën s’pranoi të vazhdonte studimet në shkollën e lartë të sigurimit. Të bëhej qen padroni. Zemra e butë s’kishte dhëmbë që të kafshonte.
-Më kot u përpoqa t’i bind. Është jashtë natyrës sime u thashë. Shkolla e sigurimit kërkon të tjerë njerëz. Unë prekem lehtë. “Do të të kalisim ne!” – ngulnin këmbë. Në fund më lanë. Por, s’më dhanë shkollë tjetër. Më dërguan ushtar në Sazan. Tre vite të rënda.
-Përsëri të besuan.
-Ç’e doja besën e çmendurisë tyre.
-Ushtar kufiri. Mund t’iu ikje.
-Ke parë filimin “Duel i heshtur”.
-Po, marinari Skënder që u përlesh me armiqtë dhe arriti ta kthejë anijen në Shqipëri.
-Në film. Aty nuk lëvizte miza e jo njeriu.
U iku i tërë populli, mendoj dhe më dalin përpara syve anijet e rrëmbyera nga një popull i pashpresë që braktiste vatanin e pushtuar për një gjysmë shekulli nga “çlirimtarët”.
-Ushtari të rrëmbente siluruesin? Nuk mund të ndodhte. Kurrë!
-Përse siluruesin?
-Aty e kam bërë ushtrinë. Brenda një kafazi hekuri.
-Motorist?
-Jo, me aparatin radiodhënës e radiomarrës.
-Mësove të japësh sinjale me anë të valëve të radios. Radio dhënës.
-Përgjonim lëvizjet e Flotës 6-të. Kamikazë.
-Përse do të vetëvriteshit? Mendonit se do të asgjësonit marinarët amerikanë.
-A ha! Jo, jo miku im. Do të futnim në luftë Kinën Popullore. Të shkatërronim botën.
-E kuptova. Ta bënit komuniste.
Aeroplanmbajtësja merr drejtimin nga jugu. Për në Mesdhe. Duket se misioni është kryer. Armët moderne rusë nuk mund të ndeshen me të. Mukja fshin sytë. Lot gëzimi.
-Gjyshi, gjyshi hajde po të presim. Sonte lind Krishti.
Nipi i hidhet në qafë. Bukuria e jetës.
Marrë nga muri i FB i Muçi Xhepes , 25 dhjetor 2021
.