Të lindur në shtrëngatë!
nga Kazanova Aliaj
E një ditë do të ndëgjoheshe deri në Amerikë oshëtima e Sharrit e Lazër & Jozef Radit!
Oshëtima e dhimbjeve që trondit me jehonën e saj luginat, e që ja përcjell kreshtës së maleve, jo si kujë por si kushtrim. E kjo grua burrneshë e lindun në shtrëngatë i mbijetoi shtrëngatave; kjo nanë e dhimbsun e nuse bujare e puthi tokën, e bashkë me burrin e njerëzit e tij kapërdinë dhimbjen dhe çau përgjysëm mllefin e ligsinë e hjenave që kishin etje veç për gjak. Me kryqin e vuejtjeve mbi shpinë e me besim në Zot, filluen shtegtimin drejt lirisë, për të cilin kishin me e pague me shumë dhimbje të drejtën njerëzore, të qenët i lirë, njat liri që Zoti ua dhuron njerzëve, me vazhdue jetën si krijesa të bekueme.
Shtegëtimi asht nji proces i vështirë… por me besimin në Zot, duheshin kapërcye kufijtë e dora-dorës ata u futën në shtegun e Lirisë së shenjtë, si katolikë e si besimtarë të devotshëm.
Liria kushton shtrenjtë! Gjithçka ndodh në jetën e kësaj familje e të kësaj gruaje, Jozef Radi e evidenton artistikisht, duke shkrue mbi të vërtetën me përkushtim, e gjithçka foli kjo grua nji ditë mori formën e nji libri, që asht tashma biografi e njerëzve të fuqishëm, model i qëndresës njerëzore!
Therëse ishte jehona e maleve, që e përcollën at oshëtimë deri n’Amerikën e largët!
Ishte jehona e nji gruaje burrneshe, e një nanë trime, e nji malsoreje që e mori dhimbjen në krahë edhe e ngriti kryqin e besimin në Zot, tue i dhanë lamtumirën tokës së vet, pse bishat e egërsueme, hijenat kishin ende… (nuk ishin mjaftue), etje për gjak. Me besimin në Zot, ajo kapërdiu gjithçka që e ka emnin dhimbje, tue e ruejtë identitetin, zakonet e besën dhe emnin malësorë, që nuk frigohen as tuten nga vdekja, po i qëndrojnë gjithçaje, me at që quhet dinjitet…
E libri vazhdon… gjithçka shkruhet në të janë fjalë shpirti e qëndrese të njerzve që s’u thyen e as ju dorëzuen së keqes…
Natyrisht, kur ta lexoni, keni me pa e me gjetë jetën e krijesave kreshnike, po ana tjetër e madhështisë së këtij libri biografik e artistik asht edhe nji tregues tjetër, i cili dëshmon për mashtrimin, që vazhdon ende sot me këto qeveritë pseudodemokratike, të nji pushteti monopartiak, me kompromiset e të dy krahëve për me i delegue pushtetin njeni-tjetrit, që nuk e zbatuen asnji ligj e nuk i dhanë asnji ndihmë, që nuk zbatuen asnji kriter damshpërblimi për të persekutuarit e vërtetë, por aty-këtu sa me ia mbyllë gojën… e asgja ma shumë!! Nji pjesë u larguen, nji pjesë vdiqën… e nga e gjithë kjo mbeti vetëm nji mashtrim i madh!! Nga gjithë këta kriminela që dikur mbushën burgjet me të burgosun të pafajshëm, me patriotë e qytetarë, me malësorë krenarë e liridashës, askush s’u dënue…!! Po ndëshkimi asht proces, e ja si po ndodh, pikërisht nëpërmjet fjalës së vërtëtë.
Pushteti i fjalës asht i pamatë!
Përtej kohës, në auditorin ma njerzor e ma të fuqishëm, përmes fjalës së vërtetë, gijotina e drejtësisë godet mizorë e ndëshkues e lartëson qëndresën e nji grueje të fuqishme si kreshtat e maleve. Ja fuqia e fjalës e këtyne gjyqeve të fuqishme me dëshmi që të trondisin, po njikohsisht i dëshmojnë këta kriminela, që i ruhen kësaj përballje, këto bastardë që janë shpërda si mijtë nga mortaja, e që ankthi i krimeve i godet e do t’i godasë edhe ma fuqishëm deri në ngordhjen e tyne, si zvarranikë që tërhiqen drejt strofullave të krimit… plot ankth.
Tashmë, kontributi juej në auditorin e lexuesve asht nji mision që po e kryen funksionin e së drejtës së shpërfillun prej këtij pushteti bastard, e që i mohon të drejtat njerëzore. Koha, me të tjera promovime do të jetë edhe ma e ashpër në gjykimin e këtyne mostrave… Këtë gjykim të fuqishëm, qytetarët e presin me padurim…
Urime Jozef Radi, në sfidat tuaja…!
Marrë nga muri i FB Kazanova Aliaj, 19 shtator 2023