“Tentativa”
rrëfim nga Anthony Perdoda
Në vitin 1973, fill mbasi mbarova gjimnazin më morën ushtar, ndërkohë që shokët e mi klasës me përjashtim të ndonjërit, të gjithë vazhduan në shkollë të lartë…
Ato kohë ishin më të vështirat e jetës sime, sepse kisha mbaruar me mesatare 9.7, por drejtori i gjimnazit u kujdes që në asnjë mënyrë unë të mos shkoja në universitet. Në fakt, edhe unë vetë e dija mirë, se nuk më lejonin të vazhdoja, mbasi isha nip i “kriminelit antikomunist” të vrarë në mal në përpjekje me bandat e Zonës së Parë Operative.
Kaq shumë u përpoq ai faqezi drejtor sa edhe në një incident që na ndodhi në mbrëmjen e fundit të maturës kërkoi të ma ngarkonte mua peshën e saj, bile ai provokoi edhe një mbledhje diskredituese ku synonte të më vinin prangat. Aq të madhe e bëri në Komitet të Partisë së Rrethit, sa në atë mbledhje pati edhe përfaqësues nga ky komitet, Komiteti Ekzekutiv Seksioni i Arsimit dhe Dega e Brendëshme.
Mbas një ore sulm mbi mua, falë shokëve të mi që nuk pranuan të instrumentalizoheshin dhe të më fajsonin mua si “armiku i klasës” munda t’u shpëtoj nga kthetrat.
Fill pas kësaj mbledhjeje, m’u krijua një gjendje tepër tepër e rëndë psikologjike aq sa shpesh herë kam menduar edhe arratisjen, pavarësisht se kurrë nuk e ndërmora një hap të tillë. Aq i tronditur isha sa sikur edhe vetëm 10 % shpresë të kisha se do t’i shpëtoja plumbit të ushtarit, unë do ta mësyja kufirin. Asnjë shpresë nuk kisha më, dhe asnjë interes për të jetuar në atë vend. Nuk e bëra kurrë atë akt. Bile edhe sikur të qëllonte që të isha në kufi dhe të më jepej shansi të arratisesha, nuk do të mund ta bëja kurrë.
Arsyeja e vetme dhe më madhorja që më pengoi ta bëja ishte se nuk mund ta pranoja që “liria ime” të bëhej skllavëria familjes së cilës i përkisja.
Ja dija mirë shijen persekutimit që na bënë për atë që xhaxhai ishte aktivizuar me forcat antikomuniste të Mirditës. Ndaj thashë: Kurrë!
Llogjika e këtij shkrimi të shkurtër:
Nuk e di sesi dikush mund të mburret si i persekutuar sot në një kohë kur thjesht për ëndrra rinie ka tentuar të kalojë kufirin dhe ka marrë në qafe vehten dhe gjithë familjen. Aq më tepër të shitet si i djathtë. Si raste të tilla që nuk të lënë radhë të flasesh, por vetëm të dëgjosh ata di mjaft.
Marre nga Muri i FB Anthony Perdoda, 7 korrik 2023