Vëllezër shkodranë! Mos harroni se jeni Shqiponja!
mesazh për artistët shkodranë nga Jetmir Barbullushi
“Oh, Shkodër, Shkodër,
çfarë vendi të bukur dhe madhështor
paska zgjedhur shqiponja për të ndërtuar folenë
dhe për të rritur zogjtë e saj!”
(Marrë nga Historia e Turqisë, shkruar nga Richard Knolles, faqe 416, botuar në vitin 1603)
Vëllezërit e mi gegë të maleve të gjigantëve
Këto ditë kemi ndjekur akte të pashembullta të ndërmarra nga qeveria shqiptare, si qendrore ashtu edhe lokale, kundër kulturës shkodrane – xhevahirit të kulturës sonë kombëtare ndër shekuj.
Me dhimbje e kam ndjekur edhe mënyrën se si e ka shprehur brengën e tij dirigjenti i njohur shkodran, Jetmir Barbullushi.
I indinjuar nga këto veprime dhe duke qenë një dashamirës i artit shkodran, si dhe mik i ngushtë i një plejade të tërë artistësh të atij qyteti, mendova t’ju sjell në vëmendje një pasazh të rëndësishëm, të gjetur në një libër anglisht të botuar në vitin 1603, me titull:
“The Generall Historie of the Turkes, from the First Beginning of that Nation to the Rising of the Othoman Familie”
Aty citohet një moment historik i rëndësishëm: Fjalët e Sulltan Mehmetit të Dytë, i cili erdhi në Shkodër dhe e mbajti të rrethuar për dy vite (1478-1479), por nuk arriti ta pushtonte me forcë. Shkodra ra në duart e turqve vetëm përmes tradhtisë, ashtu siç mund të ndodhin tradhti të tilla edhe sot!
Më 2 korrik 1478, vetë Sulltan Mehmeti II, pas një vëzhgimi të kujdesshëm nga një pikë e lartë e qytetit të Shkodrës, tha me zë të lartë:
“Oh, Shkodër, Shkodër, çfarë vendi të bukur dhe madhështor paska zgjedhur Shqiponja për të ndërtuar folenë dhe për të rritur zogjtë e saj!”
Vëllezër shkodranë! Mos harroni se jeni Shqiponja!
Jetmir Barbullushi
Marrë nga muri i FB, Mal Berisha 18 mars 2025
