Vrasja e Xhemail Mustafës
nga Ing. Nazmi Peci
Xhemail Mustafa ishte krijues letrar, dhe personalitet i shquar politik e publik në Kosovë. Ai u vra për motive politike. Xhemail Mustafa, ishte për vite të tëra këshilltar për informim i kryetarit Dr. Ibrahim Rugova, dhe kjo ishte edhe një arsye tjetër për vrasjen e tij. Si njeri ishte personaliet i urtë dhe i qetë.
Ne patëm fatin të punojmë me të këtu në gazetën “Demokracia” dhe pastaj, për një kohë, edhe në gazetën “Rilindja” – botimi në Zvicër. Ishte kurdoherë i gatshëm dhe na ndihmonte por, më shumë se çdo gjë tjetër, ai me korrektësi afirmoi veprimtarinë e degës së LD-së në Zvicër.
Çdo herë, kur e kujtojmë Xhemën, mendja na kthehet tek forma e shprehjes dhe mënyra bindëse e shqiptimit. Kishte një zë karakteristik dhe rrallë nervozohej, prandaj nuk e di ku iu rri shpirti atyre kriminelëve që bënë atentat mbi të. E kam theksuar me dhjetëra herë se mbi intelektualët shqiptarë, pra edhe mbi Xhemën, ka rënë hakmarrja ideologjike e falangave të LPK-së të cilat tashmë po bëjnë krim në Kosovë. Po aq fajtor janë gazetat e bijve të udbashve dhe komunistëve jugosllavë të cilët, sikurse në rastin e Enver Malokut, kanë derdhur vrer edhe kundër Xhemail Mustafës – personalitetit më kredibël brenda gazetarisë kosovare.
Edhe pse nuk është moti, ai u harrua dhe kjo bëhet nga shokët e tij që vrapojnë pas posteve politike. Heshtja e kobshme për vrasjen e Xhemail Mustafës është e dhimbshme. Ai nuk duhet të harrohet kaq shpejt sepse për të gjallë është satanizuar nga batonët e vetonët e zi të gazetarisë shqipe në Kosovë. U bë një vit dhe askush nuk shkoi për t’i shfletuar ato gazeta për të parë sakt se kush thirrte dhe kërkonte vrasjen e tij. Gjërat janë të shtypura në letër dhe historia dikënd duhet ta mallkojë vetëm se duhet që organet e drjtësisë dhe ato ndërkombëtare të merren me rastin. Pa dyshim një pistë e këtij rasti është kompania “Koha” e Veton Surroit dhe Baton Haxhiut, pastaj agjencionin ideologjik Kosovapress dhe tërë shtypi i majtë që ka filluar të lulëzojë në Kosovë.
Tash po mbushet një vit. Unë e kujtoj Xhemail Mustafën, siç e theksova më lart, sa ishte në Zvicër, atëherë kur në zyrat e degës së LDK-së këtu, ai i pat përgatitur 14 numrat e gazetës “Demokracia”, e cila iu parapriu gazetave serioze shqipe që pastaj u botuan në Zvicër. Po ashtu Xhema ishte në tre muajt e parë edhe redaktor i gazetës “Rilindja” dhe falë tij rikthehet emri i gazetës vetëm pas pak kohësh kur pushtuesit serb me dhunë e pat ndaluar botimin e saj në Prishtinë. Në atë kohë kryetari Dr. Ibrahim Rugova kishte nevojë për të. Xhema u kthye në Prishtinë dhe u bë këshilltari më i vyeshëm dhe më i afërt i kryetarit dr. Ibrahim Rugova.
Pa asnjë dyshim, Xhemail Mustafa u vra vetëm për motive politike. Ai ishte njëri nga themeluesit e Lidhjes Demokratike të Kosovës dhe ishte këshilltar për informim në zyrën e kryetarit të Republikës së Kosovës Dr. Ibrahim Rugova
Luzern, 17 shkurt 2001
Marrë nga libri në botim: Ing. Nazmi Peci, “Demokracia e Prolonguar”, (përgatitur nga Shefqet Dibrani dhe Demë Jashari) muri i Shefqet Dibranit