Ylli Krasniqin e arrestuan vetëm 18 vjeç?!
nga Roland Zhezha
Më 13 shkurt 2023, u shua në Gjermani ku jetonte prej disa vitesh, ish – i dënuari politik, Ylli Krasniqi. Ai hyn te personat të cilët regjimi i dënoi në moshë fare të re.
Ylli Krasniqi lindi në Fier më 29 mars 1965. Babai i Yllit, Myslimi, kishte lindur në vitin 1920, në Sibofcë të Prishtinës, ku si rezultat i persekutimit nga serbët, erdhi në Shqipëri në fillim të viteve ‘50. Shteti Shqiptar i asaj kohe i vendosi në fermën e Llakatundit, së bashku me emigrantë të tjerë si Ukë Selimi, Alush Berisha, Kolë Berisha.
Ai u orvat të arratisej nga kampi, në drejtim të Greqisë, por u pikas nga organet e Sigurimit dhe u arrestuan jo shumë larg kampit. Edhe ndaj djalit të tij, Yllit, pritej të ishte po i njëjti qëndrim i ashpër.
Ylli Krasniqi u arrestua në 5 nëntor 1983 në moshën 18-vjeçare, në kinemanë e vjetër, në lagjen “Kastriot” në Fier, në kohën kur po zhvillohej një mbledhje me të rinjtë e Bashkimit të Rinisë së Punës së Shqipërisë.
Këtë veprim publik e bënë me qëllim që arrestimi të kishte efekt në popull. Fillimisht, ishte kryetari i Degës së Punëve te Brendshme Fier, që mbajti një fjalim kundër Yllit. Hetuesi i kësaj çështje, Bujar Sheshi, rrinte mbas Yllit. Synimi ishte që të poshtërohej publikisht. Në mes të mbledhjes, hetuesi i çeshtjes do t’i deklaronte arrestimin “në emër të popullit”! Ai e lidhi me tel dhe e dërgoi në birucën nr. 18, të Degës së Punëve të Brendshme Fier, e ngushtë sa për një person.
U akuzua në bazë të neneve 47/gj, 11/2, 55/1 të Kodit Penal. Gjykata arsyetonte se i pandehuri: “Duke patur zbrazëti në formimin e tij politik dhe ideologjik, ka arritur të armiqësohet me pushtetin popullor deri në atë shkallë sa të kryejë krime të rënda kundër shtetit siç janë krimi i tradhtisë ndaj atdheut, vepër e cila është shoqëruar dhe me agjitacion dhe propagandë kundër shtetit”.
Argumenti kryesor ishte se në vitet 1981-1982, në familjen e tij erdhën disa vizitorë nga Kosova, si motra e tij me bashkëshortin dhe gjyshja. Sipas akuzës këta e kishin përpunuar “e nxitur që të braktiste atdheun nëpërmjet arratisjes…”, mbasi ishte interesuar për të njohur terrenin në Kukës e Tropojë, duke gjetur dy harta të Shqipërisë. Po ashtu i lidhen shprehje se këtu nuk jetohej mirë, se jashtë kishte liri, etj. Për të realizuar arratisjen, ishte nisur më 8 tetor 1983, në Rrëshen. Fjeti një natë aty dhe shkoi në qytetin e Kukësit, por u kthye pa avancuar më tej. Pavarësisht se nuk iu drejtua kufirit, iu hap procesi penal.
Gjykata e Rrethit Fier, e drejtuar nga Dalip Bushi, me pjesëmarrjen e prokurorit Thoma Gallani, me vendimin nr. 29, datë 7.12.1984, e deklaroi fajtor dhe e dënoi me 12 vjet heqje lirie dhe heqjen e së drejtës zgjedhore për 5 vjet.
Ylli Krasniqi e vuajti pjesën më të madhe të burgimit në Repartin nr. 311, Qafë-Bari. Kështuqë, rinia i shkoi duke nxjerrë mineral në atë vend të mallkuar. Puna e rëndë i la pasoja.
U lirua më 7 gusht 1990, nga Reparti nr. 305 Përparim. Nuk ndenji shumë, por realizoi arratisjen në Jugosllavi, nga Mali i Zi. Ku tani do të ishin jugosllavët që e arrestuan. E mbajtën 5 muaj të burgosur në Prishtinë. E akuzuan si antijugosllav e antiserb. I paraqitën si prova po atë dosje hetimore që i ishte përgatitur në Fier, në të cilën gjendeshin deklarime e tij kundër serbëve dhe jugosllavëve…
Deri në fund të jetës së tij, Ylli Krasniqi i kallëzoi me emra dhe mbiemra persekutorët e tij.
Kishte në plan botimin e një libri mbi jetën e vet, të cilin fati i keq nuk e ndihmoi ta realizonte.
Marrë nga Muri i FB i Roland Zhezhës, 20 shkurt 2023