Zef Ujkaj – Piktor me aftësi të spikatura
Material i marrë me redaktime nga Gëzim Kabashi
Zef Ujkaj u lind në Tiranë më 16 mars 1936.
“Pikturën e kishte pasion dhe gjithë kohën e lirë rrinte duke pikturuar, nga gjymat në oborr deri te gjyshja e te ne vëllezërit”, shkruante dikur vëllai i tij i ndjerë Gjergj Ujkaj. Gjyshja i thosh: “Hiq dorë nga ai zanat, se nuk ia ka parë hajrin kush”. Por pasioni i tij ishte më i fortë.
Gjatë gjimnazit, Zefi nisi të vizitonte studion e skulptorit të njohur Sabri Tuçi, në Durrës. Punimet e djaloshit tërhoqën vëmendjen e specialistëve dhe megjithëse 20 vjeç ndjek mësimet në Liceun Artistik të Tiranës. E përfundon Liceun dhe bashkënxënësit mbajnë mend suksesin e punës me të cilën mbrojti diplomën, “Nusja kosovare”. Një tablo që entuziasmoi edhe pedagogët e tij të shquar Zajmi, Buza e Kaceli.
.
Zef Ujkaj u bë skenografi zyrtar i teatrit “Aleksandër Moisiu”, falë një rrethane fatlume. Paraardhësi i tij doli në pension. Do të fillonte një periudhë krijimi, në të cilën nuk mjaftonte muza e piktorit. Teatri si art kolektiv kërkonte idetë e të gjithëve nga regjisori e aktorët deri te ndriçimi e fonia. Me Zefin skenografia u bë një nga pikat më të forta të teatrit të Durrësit.
“Zefi nuk qe vetëm skenograf i klasit të parë, por e hidhte vështrimin edhe mbi lojën e aktorëve dhe në artin e regjisorit”
“Ato njohuri të thella nuk i kishte fituar në shkollë sepse atë ia mohuan, por me punë këmbëngulëse, me impenjim serioz, si intelektual i mirëfilltë, Zefi u formua në tryezën e punës me libër dhe penel në dorë”, do të kujtonte regjisori i ndjerë, “Artisti i Popullit” Gjergj Vlashi.
Zef Ujkaj kontribuoi në jetën artistike të Durrësit jo vetëm si skenograf e piktor, por edhe si vizionar i mendimit kulturor.
.
Vazhdoi të punojë në kavaletë si një piktor me aftësi të spikatura siç dallohet veçanërisht te “Portreti i gjyshes”, një hetim psikologjik që të mrekullon. Tablonë e fundit të jetës së tij, Zefi e punoi në ballkonin e shtëpisë dhe ua kushtoi dy vajzave të mrekullueshme Xheinit dhe Silvit, të cilat së bashku me Filikën i rritën plot kujdes prindëror.
Zefi ndërroi jetë më 18 janar të vitit 1990.
Punime nga Zef Ujkaj dhe shumë artistë të tjerë, i gjeni në Ekspozitën Kolektive në Galerinë e Artit Pamor “Nikolet Vasia” në çdo ditë të javës në orarin 9.00 – 18:00 nën kurimin e Alketa Tragaj Myshketa.
.
Marrë nga muri i Fb i Teatri Aleksandër Moisiu Durrës
.